Estás en: Portada / Sala de comunicacións / Actualidade

O conselleiro de Política Social, José Manuel Rey Varela, mantivo hoxe en San Caetano unha xuntanza de traballo con representantes desta federación

A Xunta de Galicia e Fademga abordan as liñas de traballo e colaboración que seguirán mantendo o vindeiro ano en favor da integración das persoas con discapacidade intelectual

A Administración autonómica destinou este no máis de 198.000 euros a un convenio de colaboración para contribuír ao desenvolvemento dos servizos que presta esta organización na comunidade, e dos que se benefician máis de 4.700 persoas

  • O conselleiro de Política Social, José Manuel Rey Varela, mantivo hoxe un encontro no seu despacho de San Caetano co presidente da Federación de Asociacións en favor das Persoas con Discapacidade Intelectual de Galicia (Fademga), Eladio Fernández, e outros representantes da organización
    Autor: Xoán Crespo
  • O conselleiro de Política Social, José Manuel Rey Varela, mantivo hoxe un encontro no seu despacho de San Caetano co presidente da Federación de Asociacións en favor das Persoas con Discapacidade Intelectual de Galicia (Fademga), Eladio Fernández, e outros representantes da organización
    Autor: Xoán Crespo

Santiago, 13 de decembro de 2016.- O conselleiro de Política Social, José Manuel Rey Varela, mantivo hoxe un encontro no seu despacho de San Caetano co presidente da Federación de Asociacións en favor das Persoas con Discapacidade Intelectual de Galicia (Fademga), Eladio Fernández, e outros representantes da organización. Na reunión tamén estivo presente a nova directora xeral de Maiores e Persoas con Discapacidade, Fabiola García Martínez.

A xuntanza serviu para avanzar nas liñas de traballo e de colaboración ás que a Administración autonómica e Fademga teñen a intención de dar continuidade o vindeiro ano. A Consellería de Política Social ten un convenio de colaboración estable coa devandita entidade, cuxa contía superou en 2016 os 198.000 euros. Esta achega económica por parte da Xunta de Galicia contribúe ao financiamento dos servizos que desenvolve esta federación formada por 41 entidades galegas e que presta atención a máis de 4.700 persoas con discapacidade intelectual. Así mesmo, Fademga conta cunha rede de 93 centros de atención distribuídos por toda Galicia nos que cubre servizos tanto de atención aos afectados por discapacidade intelectual e ás súas familias como de orientación para o emprego.

Rey Varela destacou a importante tarefa que no ámbito da discapacidade realizan as asociacións, organización e entidades sociais, posto que “complementan o traballo das administracións públicas; de aí a importancia de manter unha colaboración intensa e unha acción coordinada coas mesmas”. Nesta liña, o responsable da área social do Goberno galego fixo fincapé na “plena coincidencia” de obxectivos con Fademga, fundamentalmente no que atinxe a “mellorar a calidade de vida das persoas con discapacidade intelectual”.

Por último, o titular de Política Social sinalou que outras das finalidades da colaboración entre a Xunta e esta federación “é sensibilizar, informar e concienciar ao conxunto da sociedade sobre a importancia de acadar, entre todos, a plena integración das persoas con discapacidade”.
 

Tema: Benestar
Departamento: C. de Política Social