Estás en: Portada / Sala de comunicacións / Actualidade

A Xunta destaca o papel das cooperativas para impulsar o emprendemento industrial

A secretaria xeral de Emprego, Covadonga Toca, visitou hoxe en Santiago un edificio en construción da cooperativa Nova Aseconia que se dedica á reforma e rehabilitación de vivendas

Toca destacou que a Economía Social é un sector en auxe en Galicia, con máis de 7.000 entidades e 320.000 persoas

Lembrou que as empresas poden optar ao Fondo de Economía Social, a través do que Xesgalicia achega financiamento ao sector con préstamos desde 30.000 euros

Puxo en valor as ferramentas da Xunta a través da Axenda 20 para o Emprego para impulsar este sector
 

  • A secretaria xeral de Emprego, Covadonga Toca, visitou hoxe en Santiago un edificio en construción da cooperativa Nova Aseconia

Santiago, 4 de xaneiro de 2017.- A secretaria xeral de Emprego, Covadonga Toca, visitou hoxe en Santiago un edificio en construción da cooperativa Nova Aseconia que se dedica á reforma e rehabilitación de vivendas. Toca comprobou de primeira man o labor que realiza esta empresa de economía social formada por un total de 8 socios e preto de 15 traballadores e traballadoras.

Toca destacou o papel que xogan as cooperativas no tecido empresarial galego, contribuíndo a mellorar a competitividade das empresas da comunidade e a impulsar o emprendemento industrial.

A secretaria xeral de Emprego subliñou a importancia de colaborar coa Economía Social desde a Administración- un sector en auxe na Comunidade con máis de 7.000 entidades e 320.000 persoas- para contar cada vez con cooperativas de maior tamaño, máis innovadoras e que busquen abrirse a novos mercados, o que favorecerá a internacionalización do tecido industrial galego.

Neste eido, Toca recordou que o Goberno galego traballa na Estratexia para o Impulso do Cooperativismo Galego precisamente para que as cooperativas poidan gañar tamaño, innovar e abrirse a novos mercados. Esta planificación inclúe 87 medidas para potenciar a competitividade e internacionalización do sector cooperativo.

Recordou tamén que as compañías deste sector poden optar ao Fondo de Economía Social (FES), co que Xesgalicia achega financiamento ás compañías a través de préstamos desde 30.000 euros para realizar novos proxectos ou impulsar ao crecemento dos que xa están en marcha, especialmente no eido rural.

Toca sinalou que existen tamén outros apoios, a través da Axenda 20 para o Emprego, para a posta en funcionamento de proxectos entre entidades de economía social e de colaboración empresarial que aposten polo I+D+i, a comercialización ou a internacionalización; un programa de microcréditos para microempresas ao que poden acceder as cooperativas galegas; e a Rede Eusumo para que participen na identificación de proxectos que sexan viables e que consoliden emprego con base na economía social.

Con respecto a esta Rede, creada polo Goberno galego para fomentar o cooperativismo, Toca indicou que a día de hoxe esta iniciativa conta con 157 entidades adheridas, como son entidades locais, asociacións de empresas, universidades ou fundacións que contan con 14 viveiros de empresa.

A través desta Rede, a Xunta pon a disposición das cooperativas os medios necesarios para apoiar o emprendemento entre os que destacan as instalacións para albergar o inicio de proxectos empresariais, ao tempo que se impulsa este modelo no ámbito local a través de accións de formación, divulgación e asesoramento para o autoemprego cooperativo.

Entre as vantaxes de pertencer á Rede Eusumo resaltan, ademais, os beneficios propios dunha colaboración en rede, compartindo esforzos e resultados con outras entidades con intereses similares, e a utilización dos diferentes centros da Rede.

A Lei de Economía Social

Por último, a secretaria xeral lembrou que a Xunta aprobou este ano a Lei de Economía Social de Galicia que ten entre os seus obxectivos dotar ao sector da relevancia que merece polas súas achegas á sociedade.

Toca rematou a súa intervención animando ás empresas de Economía Social a seguir traballando para acadar “unha Galicia de progreso económico, sustentable e respectuosa co medio ambiente e de benestar social”.