Estás en: Portada / Sala de comunicacións / Actualidade

Xunta e o Concello de Lobeira colaboran na mellora da rede de saneamento do núcleo de Carreiras

A delegada territorial en Ourense, Marisol Díaz Mouteira, visitou as obras levadas a cabo con cargo a Orde do 14 de xuño de 2016 dentro do Plan específico extraordinario de investimentos destinados á mellora de infraestruturas e equipamentos nos concellos de Galicia

Estas subvencións permiten realizar actuacións benefician directamente aos veciños e demostran as vantaxes da colaboración entre administracións

En 2016 o Goberno galego destinou 2,4 millóns de euros para subvencionar proxectos repartidos por todo o territorio galego
 

Lobeira (Ourense), 19 de xuño de 2017.- A delegada territorial da Xunta en Ourense, Marisol Díaz Mouteira, acompañada do xefe territorial da Consellería de Presidencia, Administracións Públicas e Xustiza, supervisou as obras de mellora da rede de saneamento levadas a cabo no núcleo de Carreiras deste municipio ourensán ao abeiro dunha subvención da Vicepresidencia. Concretamente, grazas as axudas da Orde 14 de xuño de 2016 pola que se establecen as bases reguladoras e a convocatoria de subvencións, en réxime de concorrencia non competitiva, dentro do Plan específico extraordinario de investimentos destinados á mellora de infraestruturas e equipamentos nos concellos de Galicia da Vicepresidencia da Xunta.

O alcalde deste concello ourensán, Antonio Iglesias Álvarez, amosoulle á máxima representante da Xunta na provincia todas as actuacións executadas para dar resposta ás necesidades dos veciños do núcleo de Carreiras que dispoñan dunha rede de saneamento moi antiga e deteriorada e que non recollía todas as edificacións de lugar. Así, executáronse os traballos precisos para a renovación da tubaxe da rede de saneamento e a instalación dun colector soterrado de PVC.

Segundo palabras da delegada territorial, grazas a esta Orde de infraestruturas de uso público a Xunta apoia aos concellos galegos para financiar infraestruturas como obras de saneamento e abastecemento de auga, instalacións deportivas, prazas, paseos, parques infantís ou dependencias municipais.

“Estas axudas permiten levar a cabo actuacións que benefician directamente aos cidadáns, e que contribúen decisivamente á mellora da súa calidade de vida, e demostran as vantaxes da colaboración entre administracións”, asegurou Marisol Díaz.

Neste caso concreto a Xunta e o Concello DE Lobeira aunaron esforzos para facer fronte aos máis de 45.300 euros que custou a intervención. O departamento autonómico achegou 35.000 euros.

A Orde 14 de xuño de 2016 é unha ferramenta que o Goberno galego puxo este verán á disposición dos concellos para financiar infraestruturas que beneficien directamente aos seus veciños e veciñas e a súa contía cifrouse en 2,4 millóns de euros.